ថ្ងៃទី២៩ ខែវិច្ឆិកា ឆ្នាំ២០២៤
ក្រុមហ៊ុន SOGE Cambodia បានរៀបចំកម្មវិធីប្រគល់ និងសម្ភោធស្ថានីយបូមទឹកដើរដោយថាមពលពន្លឺព្រះអាទិត្យ (សូឡា) ជាផ្លូវការជូនដល់សហគមន៍ប្រើប្រាស់ទឹកឃុំវត្តតាមិមស្ថិតនៅក្នុងឃុំវត្តតាមិម ខេត្តបាត់ដំបង។ កម្មវិធីនេះមានការចូលរួមពីសមាជិកសហគមន៍ ដៃគូគម្រោង និងអាជ្ញាធរមូលដ្ឋានប្រហែល ១៨០ នាក់។ នេះបង្ហាញពីការខិតខំប្រឹងប្រែងរួមដ៏រឹងមាំឆ្ពោះទៅរកការលើកកម្ពស់ការអភិវឌ្ឍប្រកបដោយបរិយាបន្ន និងការកសាងភាពធន់នឹងអាកាសធាតុសម្រាប់ទាំងអស់គ្នា។
លើសពីនេះគម្រោងកើតឡើងបានគឺមានការគាំទ្រហរិញ្ញប្បទានពីស្ថានទូតអៀរឡង់ប្រចាំនៅវៀតណាម ក្នុងគម្រោងភាពធន់នឹងអាកាសធាតុសម្រាប់ទាំងអស់គ្នា (CREFA)តាមរយៈអង្គការអុកស្វាមប្រចាំប្រទេសកម្ពុជា និងមានការចូលរួមបដិភាគហ៊ុនរបស់សមាជិកសហគមន៍ក្នុងភាពជាម្ចាស់នៃការគ្រប់គ្រងស្ថានីយប្រកបដោយនិរន្តរភាព។
ជាក់ស្តែង ស្ថានីយនេះមាន កម្លាំងសូឡាចំនួន៧៥គីឡូវ៉ាត់ស្មើនឹង១៤ជើងទម្រសូឡារេតាមពន្លឺថ្ងៃ និងម៉ូទ័របូមទឹក៩០សេះសរុប ដែលអាចបូមទឹកផ្គត់ផ្គង់ដីស្រែនិងចំការហូបផ្លែចំនួន១៥០ហិកតា និងប្រជាជនទទួលផលប្រហែល២០០គ្រួសារមកពី៤ភូមិក្នុងឃុំវត្តតាមិម ដើម្បីអោយពួកគាត់មានទឹកប្រើប្រាស់គ្រប់គ្រាន់ពេញមួយឆ្នាំ កាត់បន្ថយថ្លៃដើមផលិត បង្កើនទិន្នផលតាមរយៈការដាំដុះ កាត់បន្ថយកម្លាំងពលកម្ម ការចំណាកស្រុក និងផ្លាស់ប្តូរទម្លាប់ពីការប្រើប្រាស់ម៉ាស៊ីនប្រើប្រេងឥន្ធនៈមកប្រើប្រាស់ថាមពលស្អាត (សូឡា) ប្រកបដោយបរិស្ថានបៃតង។
